Heiður Ósk Eggertsdóttir

Eigandi

Heiður Ósk Eggertsdóttir er eigandi Reykjavík Makeup School og annar stofnenda og eigenda íslenska snyrtivörumerkisins Chilli in June. Hún er viðskiptafræðingur og förðunarfræðingur að mennt, útskrifuð með BSc-gráðu í viðskiptafræði frá Háskóla Íslands árið 2016 og diplóma í förðunarfræði frá Reykjavík Makeup School árið 2017.

Heiður Ósk og Ingunn Sig hafa starfað saman í snyrti- og förðunarbransanum um árabil. Þær stofnuðu HI beauty, snyrtimiðil sem náði á sínum tíma mikilli útbreiðslu á samfélagsmiðlum hér á landi. Undir merkjum HI beauty unnu þær fjölbreytt verkefni tengd förðun, snyrtivörum, fjölmiðlum og efnissköpun. Þótt HI beauty sé ekki starfandi miðill í dag lagði verkefnið mikilvægan grunn að áframhaldandi samstarfi þeirra og fyrirtækjarekstri.

Heiður og Ingunn hafa meðal annars verið þáttastjórnendur vefþáttanna Snyrtiborðið, pistlahöfundar hjá Lífinu á Vísi og þáttastjórnendur The HI beauty Podcast. Árið 2022 voru þær jafnframt aðaldómarar og álitsgjafar í sjónvarpsþáttunum Make Up í Sjónvarpi Símans.

Árið 2021 tóku Heiður og Ingunn við rekstri Reykjavík Makeup School og hafa síðan þá lagt áherslu á að þróa skólann áfram í takt við síbreytilegan förðunar- og snyrtivörubransann.

Heiður hefur víðtæka reynslu sem förðunarfræðingur og hefur tekið að sér fjölbreytt verkefni í gegnum árin. Í dag sérhæfir hún sig meðal annars í brúðarförðun og förðun fyrir sérstök tilefni.

Samhliða Reykjavík Makeup School stofnuðu Heiður og Ingunn snyrtivörumerkið Chilli in June, þar sem þær nýta saman reynslu sína úr förðunarheiminum, viðskiptum, vöruþróun og efnissköpun.

Í kennslu leggur Heiður áherslu á persónulega nálgun, fagmennsku og að undirbúa nemendur fyrir raunverulegt starfsumhverfi förðunarfræðingsins. Markmið hennar er að miðla bæði tæknilegri þekkingu og þeirri fjölbreyttu reynslu sem hún hefur öðlast innan förðunar-, snyrtivöru- og fjölmiðlabransans.

Ingunn Sigurðardóttir

Eigandi

Ingunn Sigurðardóttir er eigandi Reykjavík Makeup School og annar stofnenda og eigenda íslenska snyrtivörumerkisins Chilli in June. Hún er viðskiptafræðingur og förðunarfræðingur að mennt, útskrifuð með BSc-gráðu í viðskiptafræði frá Háskólanum í Reykjavík árið 2018 og diplóma í förðunarfræði frá Mood Makeup School árið 2014.

Ingunn Sig og Heiði Ósk hafa starfað saman í snyrti- og förðunarbransanum um árabil. Þær stofnuðu HI beauty, snyrtimiðil sem náði á sínum tíma mikilli útbreiðslu á samfélagsmiðlum hér á landi. Undir merkjum HI beauty unnu þær fjölbreytt verkefni tengd förðun, snyrtivörum, fjölmiðlum og efnissköpun. Þótt HI beauty sé ekki starfandi miðill í dag lagði verkefnið mikilvægan grunn að áframhaldandi samstarfi þeirra og fyrirtækjarekstri.

Ingunn og Heiður hafa meðal annars verið þáttastjórnendur vefþáttanna Snyrtiborðið, pistlahöfundar hjá Lífinu á Vísi og þáttastjórnendur The HI beauty Podcast. Árið 2022 voru þær jafnframt aðaldómarar og álitsgjafar í sjónvarpsþáttunum Make Up í Sjónvarpi Símans.

Árið 2021 tóku Ingunn og Heiður við rekstri Reykjavík Makeup School og hafa síðan þá lagt áherslu á að þróa skólann áfram í takt við síbreytilegan förðunar- og snyrtivörubransann.

Ingunn hefur víðtæka reynslu sem förðunarfræðingur og hefur unnið að fjölbreyttum verkefnum innan bransans, allt frá viðskipta- og auglýsingaverkefnum yfir í editorial förðun og efnissköpun.

Samhliða Reykjavík Makeup School stofnuðu Ingunn og Heiður snyrtivörumerkið Chilli in June, þar sem þær nýta saman reynslu sína úr förðunarheiminum, viðskiptum, vöruþróun og efnissköpun.

Í dag hefur Ingunn sérstakan áhuga á editorial og skapandi förðun. Í kennslu leggur hún áherslu á persónulega nálgun, sterkan tæknilegan grunn og að hvetja nemendur til að hugsa út fyrir kassann, þróa sinn eigin stíl og finna sína rödd sem listamenn.

Sunna Björk Erlingsdóttir

Kennari

Sunna Björk er förðunarfræðingur og kennari við Reykjavík Makeup School og starfar við fagið bæði hér á landi og í París. Hún lærði beauty- og fashion-förðun við Make Up For Ever Academy í París og hefur byggt upp fjölbreyttan feril innan tísku-, auglýsinga- og tónlistarbransans.

Sunna hefur unnið að verkefnum fyrir þekkt nöfn og vörumerki á borð við Björk, Gucci og Zara. Verk hennar hafa birst í breska, ítalska, pólska og skandinavíska Vogue auk þess sem þau hafa birst á forsíðum tímarita á borð við i-D, ELLE og Numéro Tokyo.

Við Reykjavík Makeup School leiðir Sunna Editorial-hluta diplómanámsins þar sem hún kennir editorial- og fashion-förðun og leiðir nemendur í gegnum sköpunarferlið, allt frá hugmynd og innblæstri yfir í fullmótað look.

Í kennslu leggur Sunna áherslu á listræna nálgun, sterka tækni og að hjálpa hverjum nemanda að þróa sinn eigin stíl. Hún sinnir jafnframt verklegum tímum þar sem nemendur fá persónulega leiðsögn og innsýn í þær aðferðir og tækni sem hún hefur þróað í gegnum störf sín innan tísku- og förðunarbransans.

Rósa Guðbjörg

Kennari

Rósa Guðbjörg er förðunarfræðingur og kennari við Reykjavík Makeup School. Hún útskrifaðist frá skólanum í nóvember 2023 með viðurkenningu fyrir framúrskarandi árangur og er jafnframt með BA-gráðu í skapandi greinum frá Háskólanum á Bifröst.

Frá útskrift hefur Rósa á skömmum tíma öðlast fjölbreytta reynslu innan förðunarbransans. Hún hefur starfað við sjónvarp, beinar útsendingar, auglýsingar, myndatökur, tónleika, sviðsverkefni, brúðkaup og kvikmyndagerð. Frá árinu 2024 hefur hún starfað hjá Sýn og öðlast þar mikla reynslu af förðun fyrir sjónvarp og vinnu á setti.

Rósa hefur einnig leitt förðunarteymi við stærri sýningar og viðburði og öðlast dýrmæta reynslu af störfum baksviðs, þar sem fagmennska og góð teymisvinna skipta lykilmáli. Árið 2026 tók hún að sér eitt sitt stærsta verkefni til þessa þegar hún var yfir förðun og hári fyrir kvikmyndina; Hvar er draumurinn.

Við Reykjavík Makeup School kennir Rósa bæði í diplómanámi skólans og á námskeiðum fyrir yngri nemendur. Rósa kennir sjónvarpsförðun ásamt content creation. Hún leggur áherslu á að miðla raunverulegri reynslu úr bransanum, byggja upp sjálfstraust nemenda og hvetja þá til að finna sinn eigin stíl.



Samhliða förðunar- og kennslustörfum starfar Rósa við samfélagsmiðla og efnissköpun fyrir Reykjavík Makeup School og Chilli in June og heldur úti Instagram- og TikTok-reikningnum @makeupby.rg þar sem hún deilir eigin verkefnum og sköpun.

Ugla Snorradóttir

Kennari

Ugla er förðunarfræðingur og kennari við Reykjavík Makeup School. Hún er uppalin á Akureyri og flutti til Reykjavíkur árið 2021 til að láta drauminn um að starfa við förðun verða að veruleika. Hún útskrifaðist sem förðunarfræðingur frá Reykjavík Makeup School sama ár með 10 í lokaeinkunn, hæstu lokaeinkunn sem gefin hefur verið við skólann.

Frá útskrift hefur Ugla byggt upp fjölbreytta reynslu innan förðunarbransans. Hún starfar í dag hjá Beautybox snyrtivöruverslun samhliða því að starfa sjálfstætt sem förðunarfræðingur, þar sem hún sérhæfir sig meðal annars í brúðar- og tækifærisförðunum.



Ugla hefur einnig starfað við fjölbreyttar myndatökur og verkefni. Árið 2022 sá hún meðal annars um förðun Kristínar Péturs, þáttastjórnanda Make Up í Sjónvarpi Símans.

Við Reykjavík Makeup School kennir Ugla í diplómanámi skólans, þar sem hún kennir meðal annars eyeliner, augnhár og Scandi Glam förðun. Í kennslu leggur hún áherslu á fallega og vandaða tækni, nákvæm vinnubrögð og að hjálpa nemendum að byggja upp öryggi og færni í förðun.

Embla Wigum

Kennari

Embla Wigum er förðunarfræðingur, samfélagsmiðlastjarna og kennari við Reykjavík Makeup School. Hún útskrifaðist sem förðunarfræðingur frá Reykjavík Makeup School árið 2017 og fór í kjölfarið að deila förðunum sínum og sköpun á samfélagsmiðlum.

Embla hóf feril sinn á TikTok árið 2019 og hefur síðan byggt upp einn stærsta samfélagsmiðlaferil íslensks förðunarfræðings, með um 2,5 milljónir fylgjenda á TikTok. Hún hefur vakið mikla athygli fyrir allt frá listrænum og skapandi förðunum yfir í beauty-efni, sýnikennslur og fræðslu um förðun og snyrtivörur.

Embla hefur starfað við samfélagsmiðla og förðun bæði á Íslandi og í London og öðlast víðtæka reynslu af því að byggja upp eigið vörumerki og skapa efni fyrir stóran alþjóðlegan áhorfendahóp.

Við Reykjavík Makeup School miðlar Embla reynslu sinni úr förðunar- og samfélagsmiðlaheiminum til nemenda ásamt reynslu sinni að vinna hérlendis og í London.

Ásta María Vestmann

Kennari

Ásta María er förðunarfræðingur, snyrtifræðinemi og kennari við Reykjavík Makeup School. Hún útskrifaðist sem förðunarfræðingur frá Reykjavík Makeup School árið 2022 og starfaði í kjölfarið sjálfstætt við fjölbreytt verkefni innan bransans, meðal annars við sjónvarp, auglýsingar og myndatökur.

Í dag starfar Ásta María á Snyrtistofunni Garðatorgi samhliða námi í snyrtifræði og stefnir á sveinspróf árið 2027. Með náminu hefur hún dýpkað þekkingu sína á húðinni og leggur sérstaka áherslu á heilbrigði húðar, góða húðumhirðu og mikilvægi þess að undirbúa húðina vel fyrir förðun.

Við Reykjavík Makeup School miðlar Ásta María reynslu sinni úr bæði förðunar- og snyrtifræði. Ásta kennir húðumhirðu og sótthreinsun áhalda og leggur áherslu á að nemendur öðlist góðan skilning á húðinni sem grunn að fallegri og vandaðri förðun.

GóGó Starr

Kennari

Gógó Starr er einn þekktasti draglistamaður Íslands og hefur verið stór hluti af íslensku drag- og sviðslistasenunni um árabil. Gógó var krýnd Dragdrottning Íslands árið 2015 og hefur síðan komið víða við sem draglistamaður, bæði hér heima og erlendis.

Sigurður Þór, sem stendur á bak við Gógó Starr, skapaði persónuna árið 2010 og hefur síðan byggt upp fjölbreyttan feril innan draglistar. Gógó átti meðal annars stóran þátt í að efla íslenska dragmenningu með Drag-Súgi og hefur komið fram á fjölbreyttum viðburðum og sýningum, meðal annars ásamt alþjóðlegum draglistamönnum úr RuPaul’s Drag Race. Árið 2018 var Gógó jafnframt valin Fjallkonan í Reykjavík.

Við Reykjavík Makeup School kennir Gógó dragförðun í diplómanámi skólans. Þar fá nemendur innsýn í þær aðferðir og tækni sem einkenna dragförðun.

Elísabet Blöndal

Ljósmyndari

Elísabet Blöndal er ljósmyndari Reykjavík Makeup School og hefur starfað við ljósmyndun frá árinu 2017. Hún hefur byggt upp fjölbreyttan feril með sérstaka áherslu á tísku-, beauty- og vöruljósmyndun ásamt viðburðum og markaðsefni fyrir fyrirtæki.

Elísabet hefur unnið að verkefnum fyrir fjölmörg íslensk og alþjóðleg vörumerki og fyrirtæki, meðal annars BIOEFFECT, The Reykjavík EDITION og Chilli in June. Verk hennar hafa birst í Vogue Scandinavia og árið 2022 var hún aðalljósmyndari sjónvarpsþáttanna Make Up í Sjónvarpi Símans.



Elísabet er aðalljósmyndari Reykjavík Makeup School og gegnir mikilvægu hlutverki í diplómanámi skólans. Hún myndar lokaverkefni nemenda í stúdíói og gefur þeim þannig tækifæri til að upplifa faglega myndatöku og útskrifast með vandað myndefni fyrir portfolio sitt.